今天外出工作, 有公司司機接送, 工作完成後, 我問司機會到那裡, 他說會到元朗, 之後, 我問他是否經上水, 他說可以經, 可以吾經, 最後, 他選擇經上水到元朗, 所以我有順風車回家...回到上水火車站只不過是5時, 所以我見時間尚早, 便到街市買餸...
買了紅椒3個($5), 草菇4兩($5), 絲瓜兩條($10), 瘦肉($12), 魚柳兩塊($8.5)
回家後, 用家中已有其他材料(粉絲、蝦乾、冬菇), 便煮出三個餸來...
(一) 蒜蓉粉絲蝦乾蒸絲瓜
(二) 紅椒草菇炒魚柳
(三) 冬菇蒸肉餅
瘦肉是自己"喙"的, 不是用機攪...由於用電飯煲蒸, 所以不能用碟, 味道很好, 肉質很林, 因為加了水去醃...其實除了加冬菇外, 更可以加馬蹄或粟米仔一齊蒸, 脆脆地, 食落更有口感...
電視教用半肥瘦豬肉, 但我個人覺得半肥瘦太肥, 我寧願用瘦肉, 可能不夠滑, 但蒸起來仍很鬆軟, 一樣好好味, 最重要是不肥膩...
最近可以準時放工, 所以每天放工後的例行工作便是買餸煮飯...
今晚煮了兩個餸: (一) 薯仔甘笋煮豬扒, (二) 西蘭花木耳炒魚柳
最近百住鯰魚柳特價, $8.5有兩塊, 所以我買定幾包, 以備不時之需...而豬扒我通常買現成已醃的, 因為放工後沒有時間去醃, 況且, 現成的豬扒味道也不錯...
我懶得用碟去盛載, 煮完後連埋個鑊便拿上枱...
次次聽講座都話食西蘭花好, 所以我每個星期都會食兩三次...
今日打九號八風球, 所以無特別去買餸, 不過好彩屋企經常有糧食貯備, 而咁岩我又預備了一些已發好的花膠, 所以今餐餸真係簡單得黎又有d矜貴...
花膠炆冬菇
材料: 已發花膠8隻, 冬菇8隻、椰菜半個
做法: 用薑起鑊, 先炒冬菇, 然後, 加入兩湯匙蠔油, 一茶匙糖及一碗水去炆冬菇, 大約炆15分鐘, 之後再加入花膠再炆10分鐘, 間中可水可能乾, 所以見無水, 就要加點水去炆, 炆的同時, 可以預備椰菜用來墊底, 不一定是椰菜, 西蘭花, 西生菜都得...都係o個句, 我屋企有乜, 就會煮乜... 煮菜的方式可以用烚或炒都得, 無所謂...
最後將已炆好的冬菇和花膠上碟, 即成...
其他餸的配搭都幾奇怪, 煎豆腐, 煎午餐肉, 都係屋企有的糧食, 樓下酒樓的雙併飯, 好抵! 22蚊, 大大盒, 飯都吾駛煮, 又有叉燒又有雞...
這晚大家姐和姐夫來我家食飯, 不過, 我沒有特別煮多些餸, 因為平時我和b豬爸就是吃那麼多餸...
1. 彩椒蕃茄香草焗魚柳
材料：
彩椒各一個 (即是紅黃綠椒, 不過綠色無咁甜, 所以我通常只會加半個, 或者用黎炒其他餸, 不過今次加左...
蕃茄兩個
日本白菇一包
鯰魚柳一包(內有兩塊, 之前百佳有特價, $8.9兩塊, 而家無啦!)
做法好簡單, 適合吾鐘意洗鑊同抹廚房的人煮...不過要有焗爐...
先將彩椒、蕃茄切粒, 放入大碗內, 然後白菇洗淨去尾瀝乾水放埋入大碗, 之後, 加入橄欖油、香草、胡椒粉、糖、鹽調味, 備用...
至於魚....先解凍, 瀝乾水, 用橄欖油、胡椒粉, 少許鹽均勻的塗在魚塊上
焗爐預熱, 在盆上加上鍚紙, 將魚放在錫紙上, 將已調味的彩椒各樣舖在魚塊上, 之後用另一張錫紙覆蓋, 放入焗爐, 焗15分鐘, 之後, 拿走舖在面上的錫紙再焗多5分鐘, 即成..
2. 柚子蜜排骨
材料: 排骨及南瓜
通常去酒樓食排骨都會有d野墊在排骨與碟的中間, 我今次就是用了南瓜, 原因無乜特別, 因為屋企咁岩有, 而且係自己種的有機南瓜, 所以試下效果如何...
先將排骨加柚子蜜、鹽、胡椒粉、鼓油、油、生粉調味, 醃一個鐘, 由於柚子蜜已經好甜, 所以不用加糖...
南瓜去皮切薄片, 放在碟上, 因為我用飯煲蒸, 所以正確來說不是碟, 是蒸餸兜...放好後, 將已醃好的排骨舖在上面, 我見有南瓜剩所以再舖些在排骨上以作點綴...
3. 粉絲蝦乾蒸勝瓜
材料：粉絲一小包、勝瓜兩條、蝦乾隨意、蒜蓉大量...
絲瓜去皮, 切成不規則形狀, 將已浸軟的蝦乾及粉絲加入蒜蓉及調味, 調味好簡單, 都係鹽、油、胡椒之類, 可以加點蠔油, 將所有配料攪勻, 舖在勝瓜上, 約蒸15分鐘, 即成...
4. 花生雞腳節瓜湯
大家有無留意, 今餐全部餸都係用蒸同焗的方法去煮, 咁樣油煙會少好多...
昨天在羅李塊田收了些扁豆, 就用來炆排骨吧! 除了排骨, 我還加了薯仔蛋及紅蘿白, 不得不提那些薯仔蛋, 是從筲箕灣買回來的, 因工作的關係, 我 到筲箕灣一遊, 順道逛逛金華街街市, 那裡的東西超平, 一扎韮菜花只需3塊錢, 我以前在上水買過, 最便宜的也要$8.9, 現在$3就可以買到, 我怎可能不買呢! 再多逛幾步, 發現薯仔蛋$3一袋, 每一袋要10多個, 如果買兩袋, 價錢可以再便宜一塊, 即是5塊兩袋, 我的雙眼真的是發光啦! 我想也不想, 便買下了兩袋...雖然回家的路要帶著那沉甸甸的東西, 但是...值得的!
回家了...用日本醬油, 味林炆扁豆排骨, 由於薯仔蛋太多了, 我只用了一袋, 一袋薯仔蛋也分開兩個煮法, 一半用來炆, 另一半用來做香草沙律...
另外, 我將韮菜花切條, 加從流浮山買來的蝦乾剪蛋餅, 我第一次弄這個菜, 但效果不錯啊! 最後一碟就是我們自己種的有機菜, 很好味!
幾個月前買了一包紅豆, 用了一半做紅豆糯米滋, 但不成功...
遺下來的另一半, 用來做什麼呢?
看看廚房有什麼東西, 有什麼便做什麼吧! 原來有用剩一半的椰漿和牛奶, 也有大菜絲, 那便來個豆紅糕~~
其實我已預先一天用熱水浸紅豆, 但一天後, 紅豆仍是硬硬的, 所以第二天我用真空煲再煲了它們一天, 但結果還未夠軟, 最後我用明火煲他們, 就這樣一煲便煲了一個小時, 但紅豆終於好似還有點兒硬, 最後我出絕招....磨爛它們, 使他們變成蓉。千辛萬苦, 終於預備好了紅豆...
之後, 便要煲溶大菜, 之後加入冰糖, 煮溶後再加入紅豆煮勻, 之後將他們放入容器內放涼...底層的紅豆糕完成了...
到第二層...煮滾水加入冰糖及大菜絲, 溶解後加入牛奶及椰漿慢火煮一會兒, 熄火, 然後, 看看第一層是否已定了形, 如是的話, 便將第二層們在上面...這便完成了, 最後放入雪櫃...
我起初以為我做出來的紅豆糕只有兩層, 但出來的效果竟有三層, 因為第二層的材料有椰漿, 由於它有油份, 所以將連牛奶一同浮起, 所以中間那層是沒有牛奶及椰漿的大菜層....
味道方面, 不用多說, 好好味!
有時買餸煮得多都吾知想食乜, 上星期五放工後行吉之島, 行來行去都想吾到晚餐吃什麼...突然有promotor勁sell日本烏冬, 我諗落好似好耐無食過烏冬, 平時去舖頭食烏冬, 通常d麵質麻麻, 吾好食...我見而家sell個價錢都吾算平, 所以便試下, 希望會有個意外驚喜...
之後, 我便隨手買了些長魚蛋、用少許木耳、椰菜和一隻糖心蛋做伴菜...原來這個烏冬是撈烏冬, 不是湯烏冬, 不過無所謂, 最緊要好食...一吃之下, 噢! 真係好好食呀~~d麵質好煙x(呢個字吾識寫呀!), 果然貴野係吾同d嘅...
呢碗係龍貓, 有蛋...
呢碗我嘅, 我吾要蛋...
好簡單的晚餐, 但好好味...
2007年10月8日(星期一)
大家有無留意, 平時我最鐘意就係煮薯仔、蕃茄及紅蘿白, 因為又平, 又易煮, 又好味... 但係食得多都有少少悶, 所以今次煮d同之前好吾同嘅餸....叉燒炒雜菜絲&粟米蝦膠釀冬菇...
叉燒炒雜菜絲
材料: 椰菜、銀芽、木耳、蘿白乾及叉燒
味道: 吾錯...食起黎好爽好...
材料: 冬菇10隻、鮮蝦半斤、粟米少許
做法好簡單, 將鮮蝦做成蝦膠, 加入調味及少許粟米, 之後釀入冬菇內, 再蒸熟打獻就攪掂...不過冬菇在釀入蝦膠之前要先熟至入味, 否則蒸出來的冬菇會好淡...
仲有個湯, 係
材料: 冬瓜兩斤(一半磨茸, 一半切粒), 瘦肉10蚊切粒, 蝦大約10隻8隻, 冬菇5粒...
先煲冬菇至出味, 然後加入冬瓜及瘦肉, 最後加入蝦粒, 調味後便可以飲, 好好味架
昨天, 其實沒有想過煮飯, 因為很累...但當一想到在街外吃的東西油又多, 味精又多, 又貴, 份量又少的時候, 我便決定自己煮...我由離開公司的那一刻便開始去構思晚餐, 想了很久也沒有頭緒。我想煮一些煮法既簡單, 又不重複的餸, 最後我決定煮以下兩個餸 ~~
蝦仁炒滑滑蛋
材料: 海蝦$10(有大約30隻), 雞蛋4隻(屋企存貨), 牛奶半杯
預備工作: 將蝦取殼去腸, 用胡椒粉、糖、鹽、麻油調味備用, 雞蛋攪勻加入少量鹽, 將2茶匙粟粉加入牛奶內攪勻, 然後加入蛋漿..
煮法: 先炒熟蝦仁, 盛起備用, 然後炒蛋, 要留意, 這步有技巧, 記得用慢火慢慢煮, 用筷子慢慢攪, 避免蛋煮得太熟及太乾, 攪至還有少許蛋汁未熟時便加入蝦仁及蔥花, 兜兩兜便可上碟...
個人喜好: 我比較喜歡加牛奶及粟粉去炒蛋, 好味D, 而且又滑D...記得一定要加粟粉, 否則熟完後會出水...呢個煮法靈感是來自英式早餐入面的scrambled egg, 如加入牛油去炒作早餐味道更好...不過...都幾肥架...如要減肥, 請勿食用...
你睇d蛋一d都吾燶架, 滑一滑咁....
XO醬肉豆炒魷魚
材料: 2隻魷魚$20, 肉豆10多條$5
做法: 魷魚洗淨後切紋, 肉豆切段, 然後將他們出水備用, 之後起鑊先炒肉豆, 加入調味, 可放蠔油, 但我家沒有, 所以我用鏗魚粉調味, 再加少許糖鹽, 最後將魷魚加入, 再炒多一會, 最後加入我爸爸親手煮的XO醬兩茶匙便可上碟...
近來天氣有些乾燥, 所以想吃糖水, 所以決定煲腐竹薏米蛋糖水...我喜歡吃這個糖水, 因為我喜歡它容易煲, 而且最後可以加隻"糖心蛋"...
究竟什麼是"糖心蛋"? 原來不是太多人知道, 它就是半生熟蛋, 糖水煲完後在熄火前一兩分鐘加入雞蛋, 之後焗三分鐘便做出"糖心蛋", 不過, 火喉因蛋雞蛋的大小而略有不同...自己衡量啦!!
